Presidenti i Komitetit Olimpik të Kosovës (KOK), Besim Hasani, ka pritur të dielën në zyrën e tij, presidentin e Federatës Evropiane të Atletikës (EAA), Svein Arne Hansen dhe nënpresidentn Jean Gracia, të cilët shoqëroheshin nga kryetari i Federatës Atletike të Kosovës (FAK), Halil Sylejmani, sekretari i përgjithshëm, Abdurrahman Shkodra dhe zyrtari, Fatlum Grajçevci. Delegacioni i Federatës Evropiane të Atletikës, po e viziton FAK-un, pasi më 3 dhe 4 shtator në Hotel Swiss Diamond do të mbahet mbledhja e Bordit Ekzekutiv të Federatës Evropiane të Atletikës.

Hasani pasi falënderoi mysafirët për vizitën dhe përkrahjen e vazhdueshme dhënë Federatës Atletike të Kosovës, që nga pranimi në EAA, shprehu edhe një herë mbështetjen e KOK-ut për Federatën Atletike të Kosovës dhe të gjitha federatat tjera anëtare të KOK-ut. “Kosova debutoi me medalje të artë në RIO 2016 falë xhudos, por ne shpresojmë që një ditë në podium të kemi edhe atletët tanë”, tha Hasani.

Momentalisht tre atletë: Musa Hajdari, Vijona Kryeziu dhe Astrit Kryeziu marrin bursa nga KOK-u dhe Solidariteti Olimpik i Komitetit Olimpik Ndërkombëtar për të fituar normën Olimpike Tokyo 2020. Kreu i KOK-ut foli edhe për ngritjen e kapaciteteve të trajnerëve, pjesë e planit strategjik 2017-2020, ku që nga viti i kaluar, KOK-u ka organizuar 10 trajnime për trajnerë dhe atletika është njëra prej federatave që ka vijuar këtë kurs. Hasani kërkoi nga krerët e EAA-së të sjellin ndonjë trajner me bagazh ndërkombëtar për të mbajtur trajnime për trajnerët në Kosovë. Presidenti i EAA, Hansen, për të cilin ishte vizita e dytë bërë Kosovës, kërkoi nga Hasani mbështetje për atletikën dhe trysni më të madhe tek qeveritarët tanë për ndërtimin e një stadiumi të atletikës në Prishtinë. Nga ana e tij, nënpresidenti Gracia tha se po punojnë për ngritjen e kapaciteteve të menaxhmenteve të federatave të vogla, duke përfshirë këtu edhe Kosovën.

Në fund, presidenti Hasani u ndau librin “Debutimi i Artë”, kushtuar përvjetorit të parë të medaljes së artë të Majlinda Kelmendit.